काठमाडौं । दुई दिनदेखि परिरहेको अविरल वर्षाका कारण मकवानपुरको कुलेखानीस्थित इन्द्रसरोवर ताल भरिन लागेको छ ।
इन्द्रसरोवर ड्याम शुक्रबार साँझ नै भरिने भएपछि ढोका खोल्न लागिएको हो । बाँधको सुरक्षालाई समेत मध्यनजर गरी ढोका खोल्नुपर्ने अवस्था आएको छ ।
इन्द्रसरोवर गाउँपालिकाले बाँधका ढोका खोल्न लागिएकाले कुलेखानी बाँधदेखि तल सिस्नेरी हुँदै बागमती नदी किनाराका बस्तीहरूमा सतर्कता अपनाउन भनेको छ । बाँधका ढोका खोल्दा एक्कासि बाढी आउन सक्ने अवस्था भएपछि तटीय क्षेत्रका बासिन्दालाई सतर्क हुन भनिएको हो ।
‘बाँधका ढोका खोल्नुपर्ने परिस्थिति आइसकेकाले कुलेखानीदेखि तलका तल्लो तटीय क्षेत्रमा बसोबास गर्ने बासिन्दाहरूले उच्च सतर्कता अपनाउनु हुन अनुरो छ’, इन्द्रसरोवर गाउँपालिकाका अध्यक्ष देवकृष्ण पुडासैनी र प्रमुख प्रशासकीय अधिकृत प्रल्हाद कार्कीले शुक्रबार एक सूचना निकाल्दै भनेका छन् ।
पालिकाका अनुसार कुलेखानीको उच्चतम् तह १५३० मिटर हो । शुक्रबार अपरान्ह ४ बजेसम्म बाँधको १५ सय मिटर २६.३५ पानी पुगिसकेको छ। पानीको तह बढ्ने क्रम तीव्र रहेकाले यही दरले बढे शनिबार बिहानसम्म पूरै भरिनेछ । त्यसपछि पानी बाँधबाट पोखिएर तल्लो तटीय क्षेत्रमा जाँदा जनधनको क्षति हुनसक्ने भन्दै पालिकाले सतर्क गराएको हो ।
‘कुलेखानी प्रथम जलविद्युत केन्द्रको जानकारी अनुसार ताल भरिएपछि ओभरफ्लो हुने तथा ड्यामको ढोका जुनसुकै बेला खोल्न सकिने अवस्था आउने भएकोले कुलेखानी खोला आसपास घर भएका वडा नम्बर २ र ३ का स्थानीय बासिन्दाहरू नदी आसपास नजान जानकारी लागि अनुरोध गरिन्छ’, पालिकाले भनेको छ, ‘स्थानीयबासीहरू उच्च सतर्कता अपनाई सुरक्षित स्थानमा बस्नु हुन सूचना प्रकाशन गरिएको छ ।’
गाउँपालिकाले उच्च सतर्कता अपनाएर सुरक्षित स्थानमा बस्नु र कुनै समस्या परे सिस्नेरी प्रहरी चौकी, खानीखेत प्रहरी चौकी र सशस्त्र प्रहरी बल विपद् व्यवस्थापन केन्द्रमा टेलिफोन सम्पर्क गर्न पनि आग्रह गरेको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया