काठमाडौं । कालिमाटीमा मध्यराति एक महिलाको शव बोकर फालेको आरोपमा एक युवक पक्राउ परेका छन् ।
पक्राउ पर्नेमा बझाङ घर भएका २२ वर्षीय कविन्द्र मल्ल छन् । उनलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको छ ।
घटना ७ मंसिरको हो । कालिमाटीस्थित संगितमार्गमा एक महिलाको शव भेटियो । नामथर वतन नखुलेकी महिलाको शव भेटिएपछि प्रहरीले अनुसन्धान अघि बढाएको थियो । सो क्रममा सीसीटीभी फुटेजमा एक युवकले ती महिलालाई बोकेर त्यहाँ फालेको देखियो । ‘युवकले बोकेर फालेको देखिन्छ । अन्तै मारेर त्यहाँ ल्याएर फालेको हो वा अन्य केही हो खुल्न बाँकी नै छ’ एक अनुसन्धान अधिकृतले भने ।
सीसीटीभी फुटेजमा देखिएको चप्पल, ट्राउजर र ज्याकेटको हुलिया केन्द्रीत भएर अनुसन्धान गरेको प्रहरीले आज आइतबार एक युवकलाई पक्राउ गरेको थियो । पक्राउ परेका मल्लले उक्त फुटेजमा देखिएको व्यक्ति आफू नै भएको प्रहरीसमक्ष बताएका छन् ।
प्रहरी समक्ष उनले भनेका छन्, ‘म लागु औषध सेवनकर्ता हो । मैले बोकेर फालेको हुँ । के कसो भयो यहाँ भन्दा बढी मलाई थाहा छैन ।’
अनुसन्धानका क्रममा मृतक महिला उदयपुर घर भएकी ४५ वर्षीया जानुका सुर्खेती रहेको खुल्यो । सीसीटीभी फुटेजमा देखिएको दृश्य अनुसार ३ बजे राति ७ मंसिरमा उक्त घटना भएको हो ।
मृत भेटिएकी महिलाको ट्राउजर समेत खुल्लै रहेकाले बलात्कारपछि हत्या भएको हो कि भन्ने आशंका पनि प्रहरीले गरेको छ । तर ती महिलाको शरीरमा कुनै घाउचोट समेत नदेखिएकाले उनको मृत्यु समेत शंकास्पद देखिएको छ ।
पक्राउ परेका मल्लविरुद्ध ज्यानसम्बन्धी कसुरमा काठमाडौं जिल्ला अदालतबाट आइतबार ५ दिनको म्याद थप भएको छ । उक्त घटनाबरे अहिले प्रहरी वृत्त कालिमाटीले अनुसन्धान अघि बढाएको छ ।
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
प्रतिक्रिया