• News Portal

    • आज :

    ताजा शिर्षकहरु

    चर्चित शिर्षकहरु

    Highlights राजनीति

    सचिवालय बैठकमा ओली र प्रचण्डबीच भनाभन

    1.8K
    SHARES

    काठमाडौँ । सत्तारुढ दल नेपाल कम्युनिस्ट पार्टी नेकपाको सचिवालय बैठकमा पार्टी अध्यक्ष तथा प्रधानमन्त्री केपी शर्मा ओली र कार्यकारी अध्यक्ष पुष्पकमल दाहाल ‘प्रचण्ड’बीच मंगलबार पनि भनाभनको भएको छ ।

    पार्टीका बैठक बस्ने कि नबस्ने, कहाँ बस्ने तथा प्रस्तावमाथि छलफल गर्ने कि नगर्ने विषयमा अध्यक्षद्वय ओली र प्रचण्डबीच मंगलबारको बैठकमा भनाभन भएको हो ।

    बैठकमा आफ्ना धारणा राख्दै ओलीले अर्का अध्यक्ष प्रचण्डले आफूमाथि विभिन्न आरोप लगाएर दर्ता भएको प्रस्ताव राजनीतिक प्रतिवेदन नभइ आरोप पत्र मात्रै भएकाले त्यसमाथि छलफल हुन नसक्ने भनेपछि प्रचण्डले प्रतिवाद गर्दा भनाभन भएको हो ।

    ओलीले कुनै पनि प्रस्तावमाथि छलफल आवश्यक नै नरहेको र बैठक पनि बस्नु जरुरी नभएको बताएपछि प्रचण्डले ‘छलफल नै हुँदैन, बैठक नै बस्दैन भन्ने तपाईं को हो ?’ भन्दै प्रश्न गरेका थिए ।

    प्रचण्डले बीचमै आफ्नो कुरा काटेपछि ओलीले ‘रुलिङ’ गर्न खोजेका थिए । तर, प्रचण्डले ओलीको ‘रुलिङ’को प्रतिवाद गर्दै सचिवालय बैठकमा सबैको हैसियत समान भएको र कसैले कसैलाई रुलिङ गर्न नमिल्ने बताएका थिए ।

    बैठकको सुरुमै ओलीले प्रतिवेदनमाथि बहस र छलफल हुन नसक्ने भनेपछि प्रचण्डले त्यसको प्रतिवाद गरेका थिए । आफ्नो मन्तव्यका क्रममा पनि ओलीले प्रचण्डमाथि ‘शब्दवाण’ले घोचपेच गरेको एक सचिवालय सदस्यले बताए ।

    ओलीले बैठकमा आरोपपत्रका रुपमा आएको प्रस्तावमाथि छलफल हुन नसक्ने बताएका थिए । प्रचण्डले बैठकमा ‘छलफल हुन सक्ने वा नसक्ने भन्ने तपाइँ को हो ?’ भनेर प्रश्न गरेका थिए । सचिवालयका अधिकांश सदस्यले छलफल हुनुपर्ने भनेपछि ओलीले थप ‘घोचपेच’ गरेका थिए ।

    त्यस्तै, ओलीले बैठकबाहिरबाट सहमति खोज्नुपर्ने भन्दै बैठक नै आवश्यक नरहेको धारणा राखेका थिए । उनले प्रचण्डको प्रस्तावका कारण थप समस्या भएको आरोप लगाउँदै बाहिरबाटै सहमति खोज्नुपर्ने बताए थिए । ओलीको यस्तो भनाइ बैठक छल्ने ‘प्रपञ्च’ भएको भन्दै अन्य सदस्यहरुले विरोध जनाएका थिए ।

    ओलीले ‘प्रचण्ड’को प्रस्ताव फिर्ता हुनुपर्ने र माफी माग्नुपर्ने भन्ने प्रधानमन्त्री ओलीको अभिव्यक्तिप्रति वरिष्ठ नेता माधव नेपालले आपत्ति जनाएका थिए । बैठकमा नेता नेपालले पार्टी एकता ओली र प्रचण्डको मात्रै नभएकाले प्रचण्डद्वारा पेश गरिएको प्रस्तावमाथि छलफल हुनुपर्ने माग गरेका थिए।

    ओलीले बैठकबाहिरबाट समस्याको समाधान गर्ने बताएपछि प्रचण्डले प्रतिवाद गरेका थिए । प्रचण्डले बैठक कसैले छल्न नमिल्ने र बैठकबाट निस्किने निचोड सबैले मान्नुपर्ने बताएपछि दुई अधयक्षबीच भनाभनको अवस्था सिर्जना भएको थियो । ओलीले बैठकबाहिरबाट सहमति खोज्नुपर्ने भनेर राखेको प्रस्तावमा महासचिव विष्णु पौडेललेमात्रै समर्थन गरेका थिए ।

    प्रचण्डले ओलीमाथि प्रश्नको वर्षा गर्दै प्रतिवेदन ल्याएपछि नेकपाभित्रको विवाद नयाँ चरणमा प्रवेश गरेको थियो ।ओलीले पनि प्रचण्डको काउन्टरमा प्रतिवेदन ल्याएपछि पार्टीभित्रको विवाद र नेतृत्वतहको विवाद थप उत्कर्षमा पुगेको छ ।

    बैठकपछि प्रवक्ता नारायणकाजी श्रेष्ठले आजको बैठकमा ओली र प्रचण्डको दुबै प्रस्तावमाथि छलफल सुरु भएको र औपचारिक तथा अनौपचारिक तहबाट छलफल गरेर समस्याको समाधान खोजिने बताए ।

    उनका अनुसार बैठकमा प्रचण्ड र ओलीले आ-आफ्ना धारणा राख्नुका साथै पार्टी विभाजन हुन नदिन सबैले प्रतिवद्धता जनाएका थिए । बैठकमा प्रधानमन्त्री तथा पार्टी अध्यक्ष ओली र कार्यकारी अध्यक्ष ‘प्रचण्ड’का प्रस्तावमाथि छलफल प्रारम्भ भएको छ ।

    अध्यक्ष ओलीले मंसिर १३ गतेको सचिवालय बैठकमा ३८ पृष्ठको ५३ बुँदे प्रस्ताव पेश गरेका थिए । कार्यकारी अध्यक्ष पुष्पकमल दाहाल ‘प्रचण्ड’ले कात्तिक २८ गतेको सचिवालय बैठकमा १९ पृष्ठको राजनीतिक प्रतिवेदन पेश गरेका थिए । सचिवालयको अर्को बैठक बुधबार दिउँसो १ बजे पुनः बस्नेगरी स्थगित भएको छ ।

    सञ्चारकेन्द्र
    [email protected]

    नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।

    सञ्चारकेन्द्रबाट थप +
    प्रतिक्रिया