• News Portal

    • आज :

    ताजा शिर्षकहरु

    चर्चित शिर्षकहरु

    Highlights फोकस

    अमेरिकन आइडलको टप ७ मा पर्न सफल भए नेपाली युवा दिवेश, यस्ताे छ उनले नाम परिवर्तन गर्नुको रहस्य

    काठमाडौं । नेपाली युवा दिवेश पोखरेल उर्फ आर्थर गन अमेरिकाको बहुचर्चित गायन रियालिटी शो अमेरिकन आइडलको टप ७ मा पुग्न सफल भएका छन् । उनी अब फाइनलमा पुग्न एक खुड्किला मात्रै बाँकी छ ।

    भोटिङका आधारमा भइरहेको प्रतिस्पर्धामा दिवेशले टप ७ मा स्थान बनाएका हुन् । टप ७ मा पुगेसँगै उनले आज दिएको प्रस्तुतिपछि फाइनलका लागि भोटिङ भइरहेको छ । आजको एपिसोडमा उनले सामुयल इ राइटको ‘किस द गर्ल’ बोलको गीत मेलोडियस स्वरमा गाए । आज पनि उनले निर्णायकहरुको तारिफ बटुलेका छन् ।

    आजको प्रस्तुतिपछि भएको भोटिङका आधारमा टप ७ बाट पाँच जनालाई फाइनलमा लगिनेछ । फाइनल अर्को साता १७ मेमा हुनेछ । अमेरिकन आइडलमा भोट दिन तीन तरिका छन् । एसएमएस गरेर, अमेरिकन आइडलको एप डाउनलोड गरेर र अमेरिकन आइडलको वेबसाइटमा गएर । तीनवटै विधीबाट १०–१० पटक भोट गर्न सकिन्छ । तर, यो अमेरिकामा बस्नेहरुका लागि मात्रै हो । नेपाल र अन्य मुलुकबाट भोट गर्न चाहिँ भीपीएन डाउनलोड गर्नुपर्ने हुन्छ ।

    काठमाडौंको रवीभवनमा जन्मेका दिवेश सन् २०१४ देखि अमेरिकामा बस्दै आएका छन् । उनी परिवारसहित अमेरिकाको कान्ससस्थित विचिटामा बसोबास गर्छन् । काठमाडौंको रविभवनमा जन्मेका दिवेश सानैदेखि संगीतका पारखी थिए । स्कुल–कलेजका कार्यक्रमहरूमा गाउने गर्थे । यद्यपि, सांगीतिक क्षेत्रमा नै समर्पित भएर लागेको भने अमेरिका गएपछि मात्रै हो ।

    दिवेशका बुवाआमा सन् २००८ मा अमेरिका गएका थिए, जतिबेला दिवेश स्कुल पढ्दै थिए । प्लस टुको अध्ययन सकेपछि उनी पनि सन् २०१४ मा अमेरिका गए । दिवेशका चार दिदीबहिनी छन् । अडिसनमा दिवेशले दिदी रुपालाई साथ लिएर गएका थिए । संगीतमा लाग्न उनलाई परिवारको पूरा सपोर्ट छ ।

    अमेरिकाको कान्ससस्थित विचिटामा परिवारसँग बस्दै आएका दिवेश शहरमा रहेका कफी हाउसहरुमा गाउने गर्थे । उनले न्यूयोर्क, सान फ्रान्सिस्को, लस एन्जेलसका सडक–गल्लीहरुमा पनि गिटार बजाउँदै गाएका छन् ।

    सन् २०१८ मा दिवेशले नेपाली गीतहरुको एल्बम निकाले । उनको ‘ग्रहण’ एल्बममा आठ वटा गीत छन् । सबै गीतहरु उनी आफैंले लेखेका हुन् । यसमा रहेको ‘न्यानो घर’ बोलको गीत दिवेशले यूट्यूवमा समेत राखेका छन् जसको भ्यूज ४६ लाखभन्दा बढी छ । उक्त एल्बम सार्वजनिक गर्नेबेला उनी नेपाल आएका थिए ।

    दिवेशले सन् २०१९ मा केही नयाँ गीतहरु रेकर्ड गरे । जसमध्ये ‘म’, ‘खोज’, र ‘कर्णाली’ बोलका गीत गत डिसेम्बरमा उनले आफ्नै नामको च्यानलबाट यूट्यूवमा अपलोड गरेका छन् । यी गीतहरुको भ्यूज सामान्य छ । दिवेशको च्यानलमा गत फेब्रुअरीमा ७० हजार ‘सब्स–क्राइबर’ थिए भने अहिले सो संख्या अढाई लाख पुगेको छ ।

    नाम परिवर्तनको रहस्य
    धेरैलाई दिवेशको अंग्रेजी नामको विषयमा पनि कौतुहल छ । अमेरिकन आइडलमा उनलाई ‘अर्थर गन’ भनेर चिनाइएको छ । साथै सामाजिक सञ्जालका विभिन्न अकाउन्टहरुमा पनि उनले यही नाम प्रयोग गरेका छन् । नेपाली नाम लुकाएको भनेर कतिपय नेपाली फ्यानहरु खुशी छैनन् ।

    ‘अर्थर गन’ दिवेशको ‘स्टेज नाम’ हो । एक अन्तरवार्तामा दिवेशले बताएअनुसार उनले सन् २०१८ बाट यो नाम प्रयोग गर्न थालेका हुन् । अमेरिकाको सांगीतिक क्षेत्रमा संघर्ष गर्ने अठोट गरेपछि नाम परिवर्तन गरेको उनको भनाइ छ । उनले आफूलाई मनपर्ने फ्रान्सेली कवि अर्थर रिमबडको नाम सापट लिएका हुन् । ‘गन’ चाहिँ लडाइँको प्रतिकका रुपमा लिएको उनको भनाइ छ । स्टेजमा प्रस्तुति दिने कलाकारहरूले यसरी अर्को नाम राख्दा त्यसलाई ‘स्टेज नेम’ भन्ने गरिन्छ ।

    अमेरिकन आइडलमा चाहिँ उनी आफ्नो वास्तविक नाममै सहभागी हुन सक्थे । यसमा भाग लिन अमेरिकी नागरिक नै हुनुपर्ने बाध्यता छैन । खाली तत्कालिन समयमा अमेरिकाको वैधानिक बासिन्दा भए पुग्छ ।

    दिवेशले अमेरिकी बासिन्दाको हैसियतमा यस सोमा सहभागिता जनाउन पाएका हुन् । अमेरिकन आइडलको परिचयात्मक भिडियो तथा अडिसनका क्रममा निर्णायकहरूलाई उनले आफ्नो वास्तविक नाम बताएका पनि थिए । साथै नेपाललाई सुन्दर देशका रुपमा चित्रित पनि गरेका थिए ।

    संसारमा आफ्नो वास्तविक नाम फेरेर अर्को नामले चिनिने थुप्रै कलाकार छन् । कलाकारले व्यवसायिक क्षेत्रमा चिनन छुट्टै नाम राख्नुका धेरै कारण हुन्छन् । आफ्नो वास्तविक नाम मन नपरेर वा आकर्षक नलागेर, आफ्नो नाम अरु कुनै चर्चित सेलिब्रिटीसँग जुध्न गएमा, उच्चारण गर्न वा सम्झिन अप्ठेरो खालको भएमा, नामले गलत वा आफूले नचाहेको अर्थ दिने अवस्थामा फेर्ने प्रचलन छ । दिवेशले चाहिँ नाम र थर दुवै फेरेका छन् । उनको नामले नेपाली हुन् भन्ने जनाउँदैन ।

    प्रतिक्रिया

    संचारकेन्द्र ट्रेन्डिङ