• News Portal

    • आज :

    ताजा शिर्षकहरु

    चर्चित शिर्षकहरु

    समाचार

    पोखराकी यी महिलामा पनि देखियो कोरोन, २७ दिनअघि कुन देशबाट नेपाल आएकी थिइन उनी ?

    1.6K
    SHARES

    पोखरा । पोखराकी ५५ वर्षीया महिलाको र्‍यापिड डायग्नोस्टिक टेस्ट (आरडीटी) किटको परीक्षण रिपोर्ट पोजिटिभ देखिएको छ । दुबईबाट २७ दिनअघि फर्किएकी पोखरा–१२ ढिकालेथरकी महिलाको रगतकाे नमुना किटबाट परीक्षण गर्दा पोजिटिभ रिपोर्ट आएको हो। पोखराको १० र १२ नम्बर वडाका ३४ जनाको नमुना परीक्षण गर्दा उनको नतिजा शंकास्पद देखिएपछि पुनः परीक्षण गरिएको थियो।

    दोस्रोपटक परीक्षण गर्दा समेत पोजिटिभ देखिएकोले स्वाब परीक्षणका लागि प्रदेश जनस्वास्थ्य प्रयोगशालामा पठाइएको छ। उक्त स्वाब पीसीआर मेसिनमा परीक्षण पश्चात कोरोना भाइरस भए/नभएको पुष्टि हुने पोखरा महानगर स्वास्थ्य महाशाखाले जनाएको छ। पोखरा–१२ का अध्यक्ष रामबहादुर कार्कीका अनुसार ती महिला आफ्नै घरमा एक्लै बस्दै आएकी थिइन्। उनी दुबईमा रहेका छोरालाई भेटेर चैत ८ मा नेपाल फर्किएकी थिइन्।

    यता कागेश्वरी मनोहरा नगरपालिका–९, पेप्सीकोला टाउनप्लानिङस्थित सनसिटी अपार्टमेन्टको ब्लक ‘ए’मा बसोबास गर्ने २९६ जनाको र्‍यापिड डाइग्नोस्टिक टेस्ट (आरडीटी) किटबाट कोभिड–१९ को एन्टिबडी परीक्षण गरिएको छ ।

    नगरपालिकाका मेयर कृष्णहरि थापाका अनुसार परीक्षण गरिएका मध्ये कसैको पनि रिपोर्ट पोजिटिभ आएको छैन। ‘सबैको रिपोर्ट नेगेटिभ आएको स्वास्थ्य सेवा विभागबाट आउनुभएका चिकित्सकले जानकारी दिनुभएको छ,’ उनले भने, ‘संक्रमित परिवारको घरमा काम गर्ने दुई युवकको पहिलोपटक नेगेटिभ आएपछि दोस्रोपटक पनि परीक्षण गरिएको थियो। हामीलाई डाक्टरले सबैको नेगेटिभ आएको बताउनुभएको छ।’

    मेयर थापाका अनुसार सो अपार्टमेन्टमा बस्ने सबै व्यक्ति तथा वरपर रहेका पसलधनीको पनि आरडीटी गर्नुपर्ने निष्कर्ष स्वास्थ्य सेवा विभागकाे टोलीको छ। ‘विभागको टोली र हामीले अध्ययन गर्दा लगभग १३सय जनाजतिको आरडीटीबाट परीक्षण गर्नुपर्ने देखेका छौं। उहाँहरूले पनि त्यही भन्नुभएको छ,’ उनले भने, ‘बाँकी निर्णय त स्वास्थ्य मन्त्रालयले लिन्छ होला।’

    उनले आजका लागि भने परीक्षणको काम लगभग सकिएको र भोलि पुनः परीक्षण हुने बताए। ‘१२–१३ सय मानिसको परीक्षण गर्न त ३–४ दिन लाग्छ होला,’ उनले भने, ‘आज पनि हामीले पहिले बिरामीहरूको परीक्षण गरेका थियौं।’

    मेयर थापाका अनुसार आज अपार्टमेन्ट परिसरमा डिसइन्फेक्टेन्ट छर्किने काम पनि भएको छ। बाहिर सडकतिर पनि डिसइन्फेक्टेन्ट छर्किइएको थियो। सबैको परीक्षण नभएसम्मका लागि उक्त अपार्टमेन्टलाई सिल नै गरेर राख्नेबारे छलफल भइरहेको थापाले बताए। उनका अनुसार भवन सिल गरेर राखिएको अवस्थामा त्यहाँ बस्नेहरूका लागि अपार्टमेन्ट व्यवस्थापन समिति र वडा कार्यालयबीच समन्वय गरेर अवश्यक सामग्री पूर्ति गर्ने व्यवस्था मिलाइँदै छ।

    ‘भवन सिल गरेकोतीन दिन भइसक्यो। त्यहाँ बस्नेहरूलाई सामान चाहिएको होला। हामीले त्यो बुझेका छौं,’ उनले भने, ‘त्यसैले वडाध्यक्ष तथा त्यहाँको व्यवस्थापन समितिलाई सहकार्य गर्न भनेका छौं। प्रहरीहरूसँग मिलेर आवश्यक सामग्री आपूर्तिको व्यवस्था मिलाउँदै छौं।’

    वैशाख १ गते नगरपालिकाले विदेशबाट आएका ३६ जनाको परीक्षण गर्ने क्रममा सनसिटीमा बसोबास गर्ने एकै परिवारका तीन जनाको रिपोर्ट पोजिटिभ आएको थियो। त्यसपछि पीसीआरबाट परीक्षण गर्दा ८१ वर्षीया आमा र ५८ वर्षीय छोरामा कोरोना भाइरसको संक्रमण रहेको पुष्टि भएको थियो। ५२ वर्षीया बुहारीको रिपोर्ट भने नेगेटिभ आएको थियो।

    उनीहरू तीनै जना चैत ४ गते राति १ बजे बेलायतबाट दोहा हुँदै काठमाडौं आएका थिए। दुवै संक्रमितअहिले पाटन अस्पतालको आइसोलेसन वार्डमा छन्। उता कैलालीकी ६५ वर्षीया कोरोना संक्रमित महिलासँगै वीरगञ्जबाट दाङ आएका तीनै जनाको स्वास्थ्य परीक्षण रिपोर्ट नेगेटिभ आएको छ ।

    दाङको बेलझुण्डीस्थित कोरोना विशेष अस्पतालमा उपचाररत व्यक्तिहरुको नमुना संंकलन गरी परीक्षणका लागि काठमाडौं पठाइएकोमा तीन जनाको रिपोर्ट नेगेटिभ आएको हो । घोराही निवासी यी तीनै जना वीरगञ्जबाट कैलाली पठाइएकी ६५ वर्षीया कोरोना संक्रमित महिलासँगै थिए ।

    कोरोना विशेष अस्पतालका मेडिकल सुपरिटेन्डेन्ट डा. सर्वेश शर्माले तीनै जनाको रिपोर्ट नेगेटिभ आउनु दाङका लागि सुखद् भएको बताए। कोरोना विशेष अस्पताल बेलझुण्डीबाट नौ जनाको थ्रोट स्वाबको नमुना परीक्षण गर्न मंगलबार काठमाडौं पठाइएको थियो । उनीहरूमध्ये कैलालीकी महिलासँगै यात्रा गरेका तीन जना र अर्का एक जना गरी चार जनाको रिपोर्ट नेगेटिभ आएको छ ।

    अन्यको रिपोर्ट भने आउन बाँकी रहेको डा. शर्माले जानकारी दिए । सोमबार कैलालीकी ६५ वर्षीया एक महिलामा कोरोना संक्रमण पुष्टि भएको थियो । गत चैत ९ गते उनी, छोरा र नातेदारसहित १५ जना भारतको बिहारबाट वीरगञ्ज आइपुगेका थिए । त्यस रात वीरगञ्जमै बसेका उनीहरूलाई अर्को दिन स्थानीय प्रशासनले कैलाली पठाइदिएको थियो ।

    त्यस्तै र्‍यापिड टेस्टमा पोजेटिभ नतिजा देखिएको गोरखाको आरुघाट गाउँपालिकाका युवकमा कोरोना संक्रमण नभएको पुष्टि भएको छ । बुधबार पोखरा स्वास्थ्य विज्ञान प्रतिष्ठानमा रहेको कोरोना परीक्षण प्रयोगशालामा परीक्षण गर्दा उनमा कोरोना संक्रमण नभएको पुष्टि भएको गोरखा अस्पतालका कोभिड १९ फोकल पर्सन नारायण अर्यालले जानकारी दिए ।

    मंगलबार आरुघाट गाउँपालिकामा र्‍यापिड डाइग्नोस्टिक टेस्ट (आरडीटी) विधिबाट परीक्षण गर्दा आरुघाट गाउँपालिका ५ का ३१ वर्षका एक युवकमा एन्टीबडी पोजेटिभ देखिएको थियो । त्यसपछि उनलाई गाउँमा क्वारेन्टाइनमा राखिएको थियो । उनी गत फागुन २२ गते बहराइनबाट फर्किएका थिए ।

    सञ्चारकेन्द्र
    [email protected]

    नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।

    सञ्चारकेन्द्रबाट थप +
    प्रतिक्रिया

    आजको ट्रेन्डिङ