• News Portal

    • आज :

    ताजा शिर्षकहरु

    चर्चित शिर्षकहरु

    समाचार

    बालुवाटार जग्गा प्रकरणबारे गच्छदारले बल्ल मुख खोले, दिए फेरी सबैलाई चकित पार्ने यस्तो बयान

    42.3K
    SHARES

    काठमाडौं । अख्तियार दुरुपयोग अनुसन्धान आयोगले बालुवाटारस्थित ललिता निवास जग्गा प्रकरणमा मुद्धा चालाएपछि प्रमुख प्रतिपक्षी दल नेपाली काँग्रेसका उपभापति विजयकुमार गच्छदारले बल्ल मुख खोलेका छन् । उनले ललिता निवास जग्गा घोटाला प्रकरणमा आफू निर्दोष रहेका प्रतिक्रिया दिएका छन् ।

    शुक्रबार बिहान सिंहदरबारमा बसेको काँग्रेस संसदीय दलको बैठकपछि पत्रकारहरुसंग प्रतिकृया दिंदै उनले भने, ‘मैले कुनै कानुन बदलेर निर्णय गरेको होइन । मन्त्रिपरिषद् बैठकबाट त्यो बेला निर्णय भएको हो । जुन निर्णय संविधान र कानुन सम्मत भएको थियो । यसमा म दोषी हुनुपर्ने कारण छैन ।’ गच्छदारले पार्टीले आफ्नो पक्षमा लिएको अडान नै आफ्नो अडान रहेको बताए ।

    उनले भने, ‘तपाईँले देखिराख्नु भएको छ । पार्टीले राजनीतिक रुपमा एकखालको अडान लिएको छ । कानुनी प्रक्रियाबारे पनि कानुन विज्ञसँगै पार्टीले सुझाव लिइरहेको छ । पार्टीको नीति अनुसार म अघि बढिरहेको छु ।’ उनी यस विषयमा थप बोल्न चाहेनन् । उनले भने, ‘म यसबारेमा अहिले बोल्ने पक्षमा छैन । २७ गतेपछि थप के बोल्नुपरेमा बोलाँैला ।’ माघ २७ गते काँग्रेसले केन्द्रीय समिति बैठक बोलाएको छ ।गच्छदारविरुद्ध भ्रष्टाचारको मुद्दा दायर भएपछि काँग्रेस सामाजिक सञ्जाल, सदन र सडकमा उत्रिएको छ ।

    अख्तियारले गच्छदारसहित १७५ जनाविरुद्ध मुद्दा दायर गरेको केही घण्टामै काँग्रेस वरिष्ठ नेता रामचन्द्र पौडेलदेखि पार्टी प्रवक्ता विश्वप्रकाश शर्मासम्मले सामाजिक सञ्जालका आक्रोश पोखेका थिए । यता अख्तियारले दायर गरेको भ्रष्टाचार मुद्दामा आफ्ना नेता विजयकुमार गच्छदारलाई प्रतिवादी बनाइएको विरोधमा कांग्रेसले सदन अवरोध गर्दै आएको छ ।

    शुक्रवार निर्धारित समय १ बजेभन्दा करिब आधाघन्टा ढिला गरि संसद बैठक शुरु हुनासाथ प्रमुख प्रतिपक्षी दल नेपाली कांग्रेसका सांसदहरु उठेका थिए । सभामुख अग्निप्रसाद सापकोटाले सदनको काम कारवाही सुरु गर्नासाथ कांग्रेसका सांसदहरु उभिए । त्यसपछि सभामुख सापकोटाले कांग्रेस सांसद मिनबहादुर विश्वकर्मालाई बोल्न समय उपलव्ध गराए ।

    सांसद विश्वकर्माले संसद अवरुद्ध गर्नु कांग्रेसको रहर नभइ बाध्यता भएको बताए । ‘चिसो मौसममा राजनीतिक वृत्त न्यायिक क्षेत्रमा अख्तियारले गरेको निर्णयका कारण काठमाडौं र मुलुक तातिएको छ । लोकतन्त्रका लागि दशकौं लडेको पार्टी हो, हिजो पनि हामीले संसद अवरुद्ध गर्‍यौं, यो कांग्रेसको रहर होइन बाध्यता हो ’ उनले भने ।

    सांसद विश्वकर्माले अख्तियारले राजनीतिक पूर्वाग्रह राख्दै कांग्रेस संसदीय दलका उपनेता विजयकुमार गच्छादारमाथि मुद्दा चलाएको भन्दै अख्तियार दुरुपयोग अनुसन्धान आयोगले नै आफ्नो अख्तियारी दुरुपयोग गरेको आरोप लगाए ।

    ‘अख्तियारले गरेको निर्णयमा झट्ट हेर्दा के पाइन्छ भने अख्तियारले नै आफ्नो अख्तियारीको दुरुपयोग गर्‍यो’ सांसद विश्वकर्माले भने,‘ललिता निवास प्रकरण काण्डमा जुन प्रधानमन्त्रीले निर्णय गर्नुभयो उहाँले ठूलो उपलव्धि भन्नु भएको छ, सचिवले गौरबमय आयोजना भन्नु भएको छ । अनि जसको कार्यक्षत्र ने पर्दैन उहाँलाई मात्र मुद्दा ।’

    ‘जसले योजना प्रस्ताव गर्नुभयो, उहाँले उन्मुक्ति पाउने, जसले मन्त्रिपरिषद् बाट निर्णय गराउनु भयो उहाँ पनि महानव्यक्ति । लाजपूर्जा बोकेर हिँड्ने पनि महान व्यक्ति, भौतिक पूर्वाधार मन्त्रालयमा नै नपर्ने कुरामा चाँही उहाँ दोषी !’ उनले प्रश्न गरे । सांसद विश्वकर्माले संवैधानिक अंग गठन गर्नुको कारण तटस्थता का लागि भएको भएपनि कसुरदारलाई उन्मुक्ति र निर्दोशलाई दोषी देखाउने काम भएको आरोप लगाए ।

    ‘निर्दोषलाई पक्रिउ गरि सारा कसुरदारलाई उन्मुक्ति दिने कुराको थालनी भएको छ यसमा कांग्रेसको आपत्ति छ’, उनले भने,‘ लालपूर्जा फिर्ता गरेर उहाँहरुलाई उन्मुक्ति दिन मिल्छ ।’ निर्णयकर्ता र फिर्ता गर्छु भन्नेलाई उन्मुक्ति दिएर नयाँ नजिर स्थापना गर्न खोजिएको भन्दै सामाजिक सञ्जालमा चर्चा भइरहेको उनले बताए ।

    ‘कुनै डाक्टरले बिरामीको चार वर्ष अघि चोर्यो र पछि फिर्ता गर्‍यो भने के हुन्छ ?’ उनले प्रश्न गरे,‘ कुनै एक चोरले साउँ व्याज फिर्ता गर्‍यो भने पक्राउ पर्छ कि पर्दैन ?’ न्याय निरुपण गर्ने निकायलाई नै सरकरको छायाँमा राखेको आशंका आफूहरुलाई लागेको मात्र भएपनि सरकारका प्रवक्ताको भनाइबाट त्यो थप पुष्टि भएको उनले बताए ।

    ‘सरकारले गरेको काम पनि सरकारको उपलव्धि भनेर प्रवक्ताले भनेका छन् यो उपलव्धि हो भने नियोजित रुपमा कांग्रेसका मान्छेलाई थुन्ने जुन प्रपञ्च रचियो यसमा पक्षपात छ कि छैन ?’ ‘ सरकारी एउटा निकायमा जसरी बसेर आफ्ना पक्षकालाई बोक्ने र विरोधीलाई ठोक्ने जुन काम भएको छ यो हामीलाई अस्वीकार्य छ’ संसद अवरोध गर्नुअघि सांसद विश्वकर्माले भने ।

    कांग्रेसका सबै सांसद उभिएपछि सभामुख सापकोटाले यो विषय अदालतमा रहेको र संसदको क्षेत्राधिकारमा नपर्ने बताएका थिए । तर कांग्रेस सांसदहरु १० मिनेटदेखि उभिएर विरोध जनाएपछि सभामुख सापकोटाले बैठक आधा घन्टाका लागि स्थगित गरे ।

     

    प्रतिक्रिया

    आजको ट्रेन्डिङ