• News Portal

    • आज :

    ताजा शिर्षकहरु

    चर्चित शिर्षकहरु

    समाचार

    नाङ्गो हस्तक्षेप नगर्न भन्दै विप्लवले अमरिकालाई दिए यस्तो कडा चेतावनी, विज्ञप्तिसहित

    7.7K
    SHARES

    समिर चन्द, काठमाडौँ । नेपाल कम्युनिष्ट पार्टीले नेपाल र नेपाल देशलाई आतङ्ककारीको सूचीमा राख्ने अमेरिकी साम्राज्यवादको रिपोर्ट खारेज गरेको छ । साथै देशलाई अन्तर्राष्ट्रिय आतङ्कवादीहरूको आश्रयस्थल र आवतजावत गर्ने थलो भनेर बदनाम गरिरहँदा समेत लाञ्छना सहेर बस्ने केपी वली सरकार साम्राज्यवादको टट्टु भएको निष्कर्ष निकालेको छ । शनिबार एक विज्ञप्ति जारी गर्दै नेकपा महासचिव विप्लवले यस्तो बताएका हुन् ।

    ‘अमेरिकाको ‘प्रतिआतङ्कवाद ब्युरो’ ले २०१९ अक्टोबरमा प्रकाशित गरेको ‘आतङ्कवादबारे देशका रिपोर्टहरू २०१८’ (कन्ट्री रिपोर्ट अन टेरोरिज्म २०१८) मा उल्लेख गरेको नेपाल र विद्रोही नेपाल कम्युनिष्ट पार्टीबारेको धारणा र विवरणप्रति आफ्नो पार्टीको गम्भीर ढङ्गले ध्यानकेन्द्रित भएको उनले बताएका छन् । महासचिव विप्लवले अमेरिकी साम्राज्यवादले नेपाल देश, नेपाली जनता र पार्टीको राजनीतिक स्वतन्त्रता एवम् अधिकारमाथि निर्लज्जतापूर्वक गरेको हस्तक्षेपको घोर भत्र्सना गर्दै उक्त रिपोर्ट झूट, भ्रामक तथा षड्यन्त्रपूर्ण भएको स्पष्ट पारेका छन् ।

    महासचिव विप्लवद्वारा जारी  विज्ञप्तिमा भनिएको छ, ‘अमेरिकाको ‘प्रतिआतङ्कवाद ब्युरो’ ले २०१९ अक्टोबरमा प्रकाशित गरेको ‘आतङ्कवादबारे देशका रिपोर्टहरू २०१८’ (कन्ट्री रिपोर्ट अन टेरोरिज्म २०१८) मा उल्लेख गरेको हाम्रो देश र पार्टीबारेको धारणा र विवरणप्रति पार्टीको ध्यान गम्भीर ढङ्गले केन्द्रित भएको छ । सर्वप्रथमतः अमेरिकी साम्राज्यवादले हाम्रो देश, नेपाली जनता र पार्टीको राजनीतिक स्वतन्त्रता एवम् अधिकारमाथि निर्लज्जतापूर्वक गरेको हस्तक्षेपको घोर भत्र्सना गर्दै उक्त रिपोर्ट झूट, भ्रामक तथा षड्यन्त्रपूर्ण भएको स्पष्ट गर्दछ ।’

    अमेरिकाले आफैँ उपनिवेशको दमनबाट फुत्किन बन्दुक उठाएर लडेको देश भएको स्मरण गर्दै विप्लवले आफ्ना अग्रजहरूको विद्रोहलाई बिर्सेर बीसौँ शताब्दीदेखि कमजोर देशहरूलाई पैतालामुनि दबाउने घोर फासिस्ट एवम् साम्राज्यवादी नीति लिएको बताएका छन् । बेलायती युगको अन्त्य भएपछि अमेरिकी युग चलेको र त्यसले विश्वशान्ति, प्रगति, मानवता र समृद्धिको मुख्य अवरोधक एवम् बाधक बनेर आतङ्क मच्चाइरहेको उनले बताएका छन् ।

    विश्वभरि चलिरहेका अशान्ति, युद्ध, विध्वंस, आतङ्क, नरसंहारको संरक्षक, सञ्चालक र स्रोत समेत बनिरहेकाे अमेरिकाने उल्टो वास्तविक शान्ति, मानवता, स्वतन्त्रता, स्वाधीनता एवम् परिवर्तनका वाहक शक्ति श्रमिक जनता, कम्युनिस्ट पार्टी र जनक्रान्तिलाई आतङ्कवादीको असैह्य आरोप थोपरेको प्रष्ट पारेका छन् । अमेरिकाले हालै नेपाल कम्युनिस्ट पार्टीमाथि लक्षित गरेको पूर्णतः अस्वीकार्य एवम् अर्थहीन आरोपमा कुनै सत्यता नरहेको उनले प्रष्ट पारेका छन् । साथै लुट र अतिक्रमणको नेतृत्व गर्ने अमेरिकालाई यस्तो आरोप थोपर्ने अधिकार र  नैतिकता नै नभएको भन्दै उनले  वैज्ञानिक समाजवादी—साम्यवादी क्रान्तिको नेतृत्व गर्ने कम्युनिस्ट पार्टी र श्रमिक वर्गका लागि यो औचित्यहीन भएको बताएका छन् ।

    महासचिवको विज्ञप्तिमा अगाडि भनिएको छ, ‘अमेरिका आफैँ उपनिवेशको दमनबाट फुत्किन बन्दुक उठाएर लडेको देश हो । आफ्ना अग्रजहरूको विद्रोहलाई बिर्सेर बीसौँ शताब्दीदेखि कमजोर देशहरूलाई पैतालामुनि दबाउने घोर फासिस्ट एवम् साम्राज्यवादी नीति लिएको छ । बेलायती युगको अन्त्य भएपछि अमेरिकी युग चलेको आतङ्क मच्चाइरहेको छ । ऊ नै विश्वशान्ति, प्रगति, मानवता र समृद्धिको मुख्य अवरोधक एवम् बाधक बनिरहेको छ । विश्वभरि चलिरहेका अशान्ति, युद्ध, विध्वंस, आतङ्क, नरसंहारको संरक्षक, सञ्चालक र स्रोत पनि अमेरिका नै बनेको छ । उल्टो उसले वास्तविक शान्ति, मानवता, स्वतन्त्रता, स्वाधीनता एवम् परिवर्तनका वाहक शक्ति श्रमिक जनता, कम्युनिस्ट पार्टी र जनक्रान्तिलाई आतङ्कवादीको असैह्य आरोप थोपर्ने गरेको छ । हालै हाम्रो जनप्रिय नेपाल कम्युनिस्ट पार्टीमाथि लक्षित गरेको पूर्णतः अस्वीकार्य एवम् अर्थहीन आरोप पनि यसैको एक भाग हो । लुट र अतिक्रमणको नेतृत्व गर्ने अमेरिकालाई यस्तो आरोप थोपर्ने न अधिकार छ, न त नैतिकता नै । वैज्ञानिक समाजवादी—साम्यवादी क्रान्तिको नेतृत्व गर्ने कम्युनिस्ट पार्टी र श्रमिक वर्गका लागि यो औचित्यहीन छ ।’

    नेपाल कम्युनिस्ट पार्टी माक्र्सवाद—लेनिनवाद—माओवाद र एकीकृत जनक्रान्तिमा विश्वास राख्ने श्रमिक वर्ग र विश्व कम्युनिस्ट आन्दोलनको एक दस्ता भएको उल्लेख गर्दै महासचिव विप्लवले यो पार्टी पेरिस कम्युन, अक्टोबर क्रान्ति, जर्मन क्रान्ति, चिनियाँ नयाँ जनवादी क्रान्तिको नेपाली प्रतिनिधि एवम् नेपाली क्रान्तिहरूको अगुवा भएको दावी गरेका छन् ।

    अमेरिकाले आफ्नो पार्टीले कहिल्यै नगरेको वीरगन्जको भारतीय कन्सुलेट कार्यालयको पर्खालमा बम हानेर भत्काइदिएको, पोखराको एयरपोर्टमा बम हानेको, गाउँका सडकका पुलमा बम हानेर क्षति गरेको र नेपाललाई अन्तर्राष्ट्रिय आतङ्कवादीहरूको आश्रयस्थल र आवतजावत गर्ने थलो भनेर बदनाम गराउन खोजेको भन्दै उनले उक्त रिपोर्टमा सतप्रतिशत झूट, भ्रामक र षड्यन्त्रपूर्ण रहेको प्रष्ट पारेका छन् ।

    महासचिवको विज्ञप्तिमा भनिएको छ, ‘अमेरिकाले बुझिराखोस्– नेपाल कम्युनिस्ट पार्टी माक्र्सवाद—लेनिनवाद—माओवाद र एकीकृत जनक्रान्तिमा विश्वास राख्ने श्रमिक वर्ग र विश्व कम्युनिस्ट आन्दोलनको एक दस्ता हो । यो पार्टी पेरिस कम्युन, अक्टोबर क्रान्ति, जर्मन क्रान्ति, चिनियाँ नयाँ जनवादी क्रान्तिको नेपाली प्रतिनिधि एवम् नेपाली क्रान्तिहरूको अगुवा हो । यसले यतिबेला दलाल पुँजीवादी सत्ताका विरुद्ध वैज्ञानिक समाजवादी सत्ता स्थापनार्थ एकीकृत जनक्रान्तिको नेतृत्व गरिरहेको छ । यसले न आतङ्कवादमा विश्वास गर्छ, न त दासत्व र पराधीनतालाई नै स्वीकार गर्छ । जनता र देशलाई हानि एवम् क्षति पुग्ने एकरत्ति कार्य पनि गर्दैन तर जनता र देशको हित एवम् मुक्तिका लागि जुनसुकै सङ्घर्ष र त्याग गर्न तयार छ । आजसम्म जनता र देशको हितभन्दा बाहिर गएर बमको कुरा कल्पनै नगरौँ, एउटा सिन्को पनि भाँचेको छैन र भाँच्ने पनि छैन ।’

    उक्त फेक रिपोर्टले शक्तिशाली भनेर प्रचार गरिने अमेरिकी रिपोर्टको कमजोर क्षमता मात्र उजागर गर्दै उसको पूर्वाग्रही, दुराशययुक्त र उत्तरसाम्राज्यवादी चरित्रको पनि पुष्टि भएको महासचिव विप्लवले बताएका छन् । यसर्थमा अमेरिकाको रिपोर्ट गम्भीर राजनीतिक अपराध भएको उनको ठहर छ । साथै यस्तो बदनियतपूर्वक बनाइएको रिपोर्ट पूर्णतः खारेज गर्दै आइन्दा यस्तो आपराधिक कार्य नगर्न उनले अमेरिकालाई चेतावनी समेत दिएका छन् ।

    महासचिव विप्लवले अगाडि भनेका छन्, ‘अमेरिकाले रिपोर्टमा हाम्रो पार्टीले कहिल्यै नगरेको वीरगन्जको भारतीय कन्सुलेट कार्यालयको पर्खालमा बम हानेर भत्काइदिएको, पोखराको एयरपोर्टमा बम हानेको, गाउँका सडकका पुलमा बम हानेर क्षति गरेको भनेर जुन रिपोर्ट उल्लेख गरेको छ साथै हाम्रो देशलाई अन्तर्राष्ट्रिय आतङ्कवादीहरूको आश्रयस्थल र आवतजावत गर्ने थलो भनेर चर्चा गरको छ, यो सय प्रतिशत झूट, भ्रामक र षड्यन्त्रपूर्ण रहेको छ । यसले शक्तिशाली भनेर प्रचार गरिने अमेरिकी रिपोर्टको कमजोर क्षमता मात्र उजागर गर्दैन, उसको पूर्वाग्रही, दुराशययुक्त र उत्तरसाम्राज्यवादी चरित्रको पनि पुष्टि गर्दछ । यसर्थमा अमेरिकाको रिपोर्ट गम्भीर राजनीतिक अपराध हो । हामी यसप्रति घोर आक्रोश र घृणा व्यक्त गर्न चाहन्छौँ । अमेरिकाले यस्तो आपराधिक कार्य नगरोस् भन्ने चेतावनी पनि दिन चाहन्छौँ । अतः यो रिपोर्टलाई हाम्रो पार्टी पूर्णतः खारेज गर्दछ ।’

    यसैगरी अमेरिकी साम्राज्यवादले नेपालको सार्वभौमिकतामाथि नाङ्गो हस्तक्षेप र अन्तर्राष्ट्रिय बदनामी गर्दासमेत मुखमा ताल्चा लगाएर बस्ने केपी ओली सरकार अमेरिकी साम्राज्यवादको टट्टु भएको महासचिव विप्लवको आरोप छ । यस्तो नक्कली, झूटो र अतिक्रमणकारी रिपोर्टमा विश्वास नगर्न विश्व समुदायलाई आग्रह गर्दै उनले आमश्रमिक जनता, उत्पीडित राष्ट्र र क्रान्तिकारी शक्तिहरूलाई प्रतिवाद गर्न विशेष अपिल समेत गरेका छन् ।

    विज्ञप्तिको अन्त्यमा भनिएको छ, ‘यसैगरी अमेरिकी साम्राज्यवादले हाम्रो देशको सार्वभौमिकतामाथि नाङ्गो हस्तक्षेप र अन्तर्राष्ट्रिय बदनामी गर्दासमेत मुखमा ताल्चा लगाएर बस्ने केपी वली सरकार अमेरिकी साम्राज्यवादको टट्टु हो भन्ने प्रस्ट पार्न चाहन्छौँ । यस्तो नक्कली, झूटो र अतिक्रमणकारी रिपोर्टमा विश्वास नगर्न विश्व समुदायलाई आग्रह गर्दै आमश्रमिक जनता, उत्पीडित राष्ट्र र क्रान्तिकारी शक्तिहरूलाई प्रतिवाद गर्न विशेष अपिल गर्दछौँ ।’

    प्रतिक्रिया