काठमाण्डाै। प्रमुख प्रतिपक्ष दल नेकपा एमालेका अध्यक्ष केपी शर्मा ओलीले सरकारमाथि परराष्ट्र नीति सञ्चालनबारे गम्भीर प्रश्नहरू उठेको टिप्पणी गरेका छन् ।
आज सोमवार प्रतिनिधिसभाकाे अन्तर्राष्ट्रिय सम्बन्ध र पर्यटन समितिको बैठकमा अध्यक्ष ओलीले परराष्ट्र नीति र व्यवहारलाई लिएर सरकारको गतिविधिबारे गम्भीर प्रश्नहरू उठेको बताएका हुन् ।
ओलीले परराष्ट्र नीतिको मामिलामा सबै राजनीतिक दलहरू एकजुट हुनुपर्ने अवस्था आएको पनि बताए । उनले भने, ‘सरकारको परराष्ट्र नीति र व्यवहारको तालमेल नभएको र अस्पष्टताबारे बजारमा गम्भीर प्रश्नहरू उठेका छन् ।
सार्वभौमसत्ता, स्वाधीनता, स्वतन्त्रता, भूगोलको रक्षा, भौगोलिक अखण्डता, राष्ट्रिय हितको सवालमा प्रश्न उठिरहेका छन् । हाम्रो छिमेक सम्बन्ध, क्षेत्रीय सङ्गठन, तिनको प्रभावकारिता, तिनीसँगको हाम्रो सम्बन्ध, हाम्रो भूमिका के, कस्तो भइरहेको छ ? हाम्रो अन्तराष्ट्रिय छवि कस्तो रहेको छ ? छिमेकीका विरुद्ध हामी प्रत्यक्ष वा परोक्ष कुनै हिसाबले पनि गतिविधि गर्दैनाैँ ।
हाम्रो भूमि कसैका विरुद्ध कसैलाई पनि प्रयोग गर्न दिदैनौँ । यस्ता हाम्रा आधारभूत सिद्धान्तहरूका प्रश्नमा राष्ट्रले एकजुट भएर पुनर्पुष्टि गर्नुपर्ने अवस्था आएको छ । अरू कुरामा प्रतिस्पर्धा हुन्छ तर बाह्य सम्बन्धमा, छिमेक सम्बन्धमा, परराष्ट्र सम्बन्धमा, अन्तर्राष्ट्रिय नीतिको मामिलामा सबै पक्षहरू एकजुट हुन्छन् ।’
नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।
सञ्चारकेन्द्र 
प्रतिक्रिया