• News Portal

    • आज :

    ताजा शिर्षकहरु

    चर्चित शिर्षकहरु

    Highlights समाचार

    धादिङमा सुख्खा पहिरो- सेनाका मेजरको कमाण्डमा ३६ सुरक्षाकर्मी उद्धारमा, हराएका मानिसहरु अझै भेटिएनन्

    174
    SHARES


    काठमाडौँ । उत्तरी धादिङको रुविभ्याली गाउपालिकाको तिप्लिङमा पहिरोमा परी बेपत्ता भएका ३ जना अझै फेला परेका छैनन् । हाल तिप्लिङ नेपाली सेनाका मेजरको कमाण्डमा ३६ जना सुरक्षाकर्मी र स्थानीय बासिन्दाले उद्धारको काम गरिरहेका छन् ।

    धादिङका प्रमुख जिल्ला अधिकारी कृष्णप्रसाद लम्सालका अनुसार बिहीबार साँझसम्म पनि हराएका व्यक्तिहरु भेटिएका छैनन् । बिहीबार साँझ रात परेपछि खोजीकार्य स्थगित गरिएको र शुक्रबार बिहान ८ बजेबाट पुनः खोजी कार्य सुरु गरिने प्रजिअ लम्सालले बताए ।

    प्रजिअ लम्सालका अनुसार हाल उद्धार कार्यका लागि नेपाली सेनाको मेजरको कमाण्डमा २० जना सेना, शसस्त्र प्रहरीका इन्सपेक्टरको कमाण्डमा ११ जना शसस्त्र प्रहरी र जनपथ प्रहरीका इन्सपेक्टरको कमाण्डमा ५ जना जनपथ प्रहरी उद्धारका लागि घटनास्थलमा खटिएका छन् । उनीहरुलाई नेपाली सेना तथा निजी हेलिकोप्टरबाट घटनास्थलमा पठाइएको थियो ।

    बिहीबार दिनभर उद्धारको प्रयास गरिएपनि माथिबाट सुख्खा पहिरो खसिरहेको कारण उद्धारमा कठिनाई भएको प्रजिअ लम्सालले बताए । उद्धारका खटिएका सुरक्षाकर्मीहरु यतिबेला तिप्लिङको लाथुङ कार्बो प्राथमिक विद्यालयमा आश्रय लिएर बसेका छन् । बिहीबार बिहान डोजरबाट बाटो खन्ने क्रममा सुख्खा पहिरो जाँदा उत्तरी धादिङको तिप्लिङमा डोजरसहित तीनजना वेपत्ता भएका थिए ।

    वेपत्ता हुनेहरुमा डोजरचालक काभ्रेका २८ वर्षीय आकाश तामाङ, सोही स्थानका २० वर्षीय सहचालक राजु तामाङ र उनीहरुलाई सहयोग गरिरहेका स्थानीय २५ वर्षीय अनिश तामाङ पनि पहिरोमा परी वेपत्ता भएका थिए । बिहीबार बिहानैबाट खोजी र उद्धार कार्य सुरु गरिएको भएपनि उनीहरुलाई फेला पार्न सकिएको छैन ।

    प्रजिअ लम्सालका अनुसार खोजीका क्रममा डोजरको आधा भाग देखिएपनि हराएका व्यक्तिहरु फेला पार्न सकिएको छैन । धादिङका प्रजिअ कृष्णप्रसाद लम्सालका अनुसार उक्त स्थान भौगोलिक दृष्टकोणले कमजोर रहेको रिपोर्ट पहिले नै आएको थियो ।

    पहिले पनि उक्त स्थानमा सुख्खा पहिरो खस्ने गरेको थियो । भूकम्पपछि उक्त स्थान अझै कमजोर बनेको भएपनि उचित सतर्कता अपनाउन नसक्दा दुर्घटना भएको प्रारम्भिक अनुमान गरिएको छ ।

    सञ्चारकेन्द्र
    emailsanchar@gmail.com

    नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।

    सञ्चारकेन्द्रबाट थप +
    प्रतिक्रिया