• News Portal

    • आज :

    ताजा शिर्षकहरु

    चर्चित शिर्षकहरु

    राजनीति

    एमसीसीबारे माधवकुमार नेपालले राखे यस्ता ७ शर्त

    1.7K
    SHARES


    काठमाडौँ । नेकपा एकीकृत समाजवादी पार्टीका अध्यक्ष माधवकुमार नेपालले यथास्थितिमा एमसीसी अघि नबढ्ने प्रस्ट पारेका छन् । उनले एमसीसीका बारेमा आफूहरुका विभिन्न सात शर्त रहेको पनि जनाएका छन् ।

    शुक्रबार नेकपा एकीकृत समाजवादीको पार्टी कार्यालय उद्घाटन गर्दै पूर्वप्रधानमन्त्रीसमेत रहेका नेपालले तत्कालीन प्रधानमन्त्री केपी शर्मा ओलीकै चासोमा हतारमा एमसीसी सम्झौता अघि बढाउन खोजिएको आरोप लगाए ।

    ‘एमसीसीका बारेमा हामी नेकपा एमालेमा छँदै तत्कालीन प्रधानमन्त्रीले आजै पास गर्ने, भोलि नै गर्ने भनेर त्यतिबेलाका परराष्ट्रमन्त्रीलाई गर्नै नहुने ठाउँमा हस्ताक्षर गराउनु भयो, उहाँकै अर्थमन्त्रीले विभिन्न हिसाबले एमसीसीका निम्ति सीमा नाघेर जानुभयो,’ उनले भने, ‘ती सबै कुराका हामी आलोचक हौं ।’

    यसै सन्दर्भमा केन्द्रित रहेर अहिले सरकारले एमसीसीलाई प्रश्न सोधेको र त्यसको जवाफ एमसीसीले पठाइसकेको उनले बताए । ती जवाफका सम्बन्धमा अध्ययन भइरहेको उनको भनाइ छ ।

    अध्यक्ष नेपालका अनुसार एमसीसीसमक्ष विभिन्न सात शर्त राखिएका छन् । ‘एमसीसीमा कुनै सेक्युरिटी अम्ब्रेलामा बस्नुपर्ने शर्त छ कि छैन ? त्यस्तो शर्त हामीलाई मन्जुर छैन भनेका छौं,’ उनले भने, ‘हामी कुनै पनि सेक्युरिटी अम्ब्रेलामा बस्ने शर्त मान्य छैन ।’

    दोस्रो शर्तमा, नेपालले स्वतन्त्र परराष्ट्र नीति अवलम्बन गर्ने, पञ्चशीलको सिद्धान्त अवलम्बन गर्र्दै असंलग्न परराष्ट्र नीतिप्रति प्रतिवद्ध रहने भएकाले यस विपरीत हुने कुनै पनि शर्त आफूहरुलाई स्वीकार्य नहुने पनि एमसीसीलाई प्रस्ट पारिएको उनले बताए ।

    यस्तै, छिमेकीप्रति कुनै किसिमको आशंका हुने परिस्थिति स्वीकार्न नसक्ने तेस्रो शर्त राखिएको उनले सुनाए । ‘प्रोजेक्टआउँदा यसको हाइटेन्सन लाइन बन्ने जग्गा नेपालको स्वामित्वमा रहने, सार्वभौम अधिकार नेपालको रहने सुनिश्चित हुनुपर्छ, यो हाम्रो चौथो शर्त हो,’ उनले भने, ‘यसको बौद्धिक सम्पत्तिमा नेपालको अधिकार रहने सुनिश्चितता हुनुपर्छ ।’

    छैटौं शर्तमा एमसीसी परियोजनामा नेपाली कामदार, नेपालीले रोजगारी पाउने कुराको सुनिश्चितता हुनुपर्ने प्रस्ट पारिएको उनले बताए ।सातौं शर्त अन्तर्गत एमसीसी परियोजनाको लेखा परीक्षणमा महालेखा परीक्षकको अधिकार रहने सुनिश्चितता हुनुपर्नेमा उनले जोड दिए । अहिले गठबन्धन भत्काउनका लागि अनेक किसिमका दाउपेच भइरहेको भन्दै उनले त्यसविरुद्ध चनाखो हुनुपर्ने बताए ।

    यस्तै प्रधानमन्त्री शेरबहादुर देउवाले अझै एक साता मन्त्रिमन्डललाई पूर्णता नदिने भएका छन्। प्रधानमन्त्री देउवाले मन्त्रीहरूको नाम दिन गठबन्धनका नेताहरूलाई आग्रह गरिरहेका छन्। तर गठबन्धनका दलहरूले तत्कालै मन्त्रीहरूको नाम दिने सम्भावना देखा परेको छैन।

    गठबन्धनमा रहेको मुख्य एक दल नवगठित नेकपा (एकीकृत समाजवादी) ले असोज ५ गते केन्द्रीय कमिटी बैठक बोलाएकोले त्यो बैठकपछि मात्रै उक्त पार्टी सरकारमा जाने संकेत गरेको छ।

    साथै प्रतिनिधि सभाको बैठक पनि असोज ४ गतेका लागि बोलाइएको छ। सरकारले बजेट प्रतिस्थापन विधेयक ल्याए पनि पारित भएको छैन।नेकपा (एकीकृत समाजवादी) का अध्यक्ष माधवकुमार नेपालले एक साताभित्र मन्त्रिपरिषद विस्तार हुने बताए।

    आज नयाँ बानेश्वरस्थित आलोकनगरमा केन्द्रीय कार्यालय उद्घाटनपछि पत्रकारहरूसँग कुराकानी गर्दै अध्यक्ष नेपालले एक साताभित्र मन्त्रिपरिषदले पूर्णता पाउने बताए। ‘हामीले पार्टी गठन गरिसकेका छौं, सरकारमा जान कुनै समस्या छैन,’ उनले भने, ‘आज भने आज भोलि भने भोलि सरकारमा जान तयार छौं।’

    उनले सरकारमा सामेल हुने पनि बताए। केन्द्र र प्रदेश सरकारमा महत्वपूर्ण भूमिका रहने अध्यक्ष नेपालको भनाइ थियो। तलैसम्म सहकार्य गरेर जाने पनि उनको भनाइ थियो।

    प्रदेश नम्बर १ र ३ मा उक्त पार्टीले मुख्यमन्त्री दाबी गरिरहेको छ। कुनै पनि दिन ती प्रदेशमा मुख्यमन्त्री फेरिएको खबर आउने पनि अध्यक्ष नेपालले बताए।

    ‘सरकारले केही दिनभित्र पूर्णता पाउँछ। असोज ५ मा केन्द्रीय कमिटी बैठकसँगै सम्भवत हामी सरकारमा सहभागी हुनेछौं,’ उनले भने।प्रधानमन्त्री देउवाले कांग्रेसबाट २ र माओवादीबाट २ मन्त्री तथा कांग्रेसबाट १ राज्यमन्त्री मात्रै बनाएका छन्। प्रधानमन्त्री देउवाले १७ मन्त्रालय आफैँसँग राखेका छन्। देउवा प्रधानमन्त्री भएको दुई महिना भइसक्दा पनि मन्त्रिपरिषदले पूर्णता पाउन सकेको छैन।

    सञ्चारकेन्द्र
    emailsanchar@gmail.com

    नेपालका उत्कृष्ठ १० अनलाइन पत्रिकाहरु भित्र पर्ने सञ्चारकेन्द्र डटकम २०७० जेठ १५ गतेदेखि सञ्चालनमा छ । यो अनलाइन मिडिया ‘सम्पूर्ण विचार, समाचार र सूचनाहरुको केन्द्र’का रुपमा स्थापित हुँदै गइरहेको छ ।

    सञ्चारकेन्द्रबाट थप +
    प्रतिक्रिया